सो अवसरमा उपप्रधानमन्त्री कमल थापाले पनि सहिद स्मारकमा फूलगुच्छा चढाई श्रद्धाञ्जलि अर्पण गर्नुभयो । राष्ट्रपति भण्डारीले सहिद स्मारकदेखि जननेता मदन भण्डारीको सालिकसम्म पुग्ने करिब ६५ मि लामो आधुनिक प्रविधिको झोलुङ्गे पुलको पनि उद्घाटन गर्नुभयो । सो अवसरमा उहाँले जननेता भण्डारीको सालिकमा पनि श्रद्धाञ्जलि व्यक्त गर्नुभयो ।

यसैगरी उहाँले सहिद स्मारक मूल प्रवेशद्वारको राखिएको ताम्रपत्रको अनावरण र स्मारकको परिसरभित्र निर्मित सहिद स्तम्भको पनि उद्घाटन गर्नुभयो । सो स्तम्भमा विसं १९९७ देखि विसं २०६२÷६३ को आन्दोलनका सहिदको आकृति झल्कने सालिक घरको स्थापना गरिएको छ । सो स्तम्भ सङ्घीय मामिला तथा स्थानीय विकास मन्त्रालयबाट रु एक करोड ५० लाखको लागतमा निर्माण गरिएको सहिद स्मारक विकास समिति हेटौँडाका अध्यक्ष डोरमणि पौडेलले जानकारी दिनुभयो ।

राष्ट्रपतिले सहिद स्मारक परिसरमा निर्मित सहिद अध्ययन तथा अनुसन्धान भवनको पनि आजै उद्घाटन गर्नुभयो । सो भवन सहरी विकास मन्त्रालयबाट अनुदान रु ४० लाखको लागतमा निर्माण गरिएको बताइएको छ । झोलुङ्गेपुल निर्माणका लागि पर्यटन विकास बोर्डबाट रु २० लाख अनुदान प्राप्त भएको सहिद स्मारक विकास समितिले जनाएको छ ।