पोखरा, ९ माघ ।
कुनै पनि सङ्घ संस्था उत्कृष्ट हुन नेतृत्व तह प्रभावकारी हुनुपर्नेमा जोड दिइएको छ । पोखरा जेसिज वर्ष २०१६ को प्रवचनमाला कार्यक्रमअन्तर्गत यहाँ आयोजित ‘उत्कृष्टताका लागि प्रभावकारी नेतृत्व’ विषयक कार्यक्रममा वक्ताहरूले नेतृत्व उत्कृष्ट भएमात्र संस्थाले आफ्नो उद्देश्य प्राप्त गर्न सक्ने जोड दिइयो ।
कार्यक्रममा जेसी निरञ्जन श्रेष्ठले मानिसको व्यक्तित्व विकासको लागि चाहिने गुणमध्ये वाक् कला एक महत्वपूर्ण पक्ष भएको बताउँदै आफ्ना विचार स्पष्ट राख्नसक्ने व्यक्ति नै समाजमा सफल हुने बताउनुभयो ।
उहाँले जेसीआई पोखरा र यस संस्थाका सदस्यलार्ई समाजमा हेर्ने दृष्टिकोण सकारात्मक रहेको उल्लेख गर्नुभयो ।
पोखरा जेसिजका अध्यक्ष जेसी गोविन्दप्रसाद देवकोटाले तालिमको माध्यमबाट व्यक्तित्व र नेतृत्व विकास गर्ने युवाको अन्तर्राष्ट्रिय संस्था जेसीआइको पोखरा शाखाले सदस्यको वाककलामा निखारपना ल्याउन निरन्तर प्रयास गर्दैआएको जानकारी दिनुभयो ।
सचिवालय व्यवस्थापन संयोजक जेसी शिव केसी, प्रवचनमाला कार्यक्रम संयोजक जेसी मोहन थापालगायतले स्पष्ट वक्ता भएका अवस्थामा समाजमा स्वभाविक रुपमै उसको व्यक्तित्व प्रभावकारी बन्नेमा जोड दिनुभयो ।
