नेपालगन्ज, २२ पुस । आपूर्तिमन्त्री गणेशमान पुनले पेट्रोलियम पदार्थको सहज आपूर्ति व्यवस्थापनका लागि सरकारले आवश्यक गृहकार्य सुरु गरिसकेको बताउनु भएको छ ।

क्रान्तिकारी पत्रकार सङ्घ, बाँकेद्वारा आज यहाँ आयोजित पत्रकार सम्मेलनमा उहाँले सरकारद्वारा प्रदान गरिने तथा निजी क्षेत्रलाई जिम्मा लगाइएको सबैखाले सेवाको आपूर्तिमा कालोबजारी नियन्त्रण हुने बताउनु भयो ।

मन्त्री पुनले भारतसँग मात्र निर्भरता हुन खोजिएको अहिलेको परिणतिलाई अब सुधार गर्नु पर्ने खाँचो औँल्याउदै सरकारले चीन र बङ्गलादेशसँग गर्न लागेको व्यापार सम्झौता अन्तिम टुङ्गोमा पुगेको छ भन्नुभयो ।

उहाँले भन्नुभयो, “इन्धन आपूर्ति राजनीतिक समस्यासँग जोडिएकाले रक्सौल नाकालाई छिटोभन्दा छिटो सञ्चालन गर्न सम्बद्ध पक्षसँग विभिन्न चरणको छलफल र वार्ता भइरहेको छ ।”