दाङ, २२ पुस ।
तुलसीपुर घोराही सडक खण्डको सौडीकुलामा बुधबार बिहान सवारी दुर्घटनामा परी मृत्यु हुनेको सङ्ख्या सात पुगेको छ ।
बाँकेको कोहलपुर मेडिकल कलेजमा उपचारका क्रममा थप दुईजना महिलाको मृत्यु भएपछि मृतकको सङ्ख्या सात पुगेको प्रहरीले जनाएको छ । घोराहीबाट तुलसीपुर तर्फ आउँदै गरेको रा १ क १९१ नम्बरको स्कुल बस र तुलसीपुरबाट घोराहीतर्फ जाँदै गरेको रा १ ज ३७२ नम्बरको यात्रुबाहक माइक्रो हाइस गाडी एक अर्कामा ठोकिँदा दुर्घटना भएको थियो ।
कोहलपुरमा तुलसीपुर–१ राणागाउँकी किमनी खड्का र सल्यान काभ्रा गाविस–६ निवासी २४ वर्षीया विष्णु विष्टको मृत्यु भएको जिल्ला प्रहरी कार्यालय दाङका प्रमुख कुँवेर कडायतले जानकारी दिनुभएको छ ।
यसअघि राप्ती उपक्षेत्रीय अस्पताल घोराहीमा थप पाँचजनाको मृत्यु भएको थियो । उपक्षेत्रीय अस्पताल घोराही कियाका चालक, मानपुर–७ वनकट्टि निवासी २० वर्षे धनबहादुर थापा (सुमन), त्रिपुर– १ नारायणपुर निवासी ३६ वर्षीया सवनम अन्सारी, सल्यान काभ्रा गाविस–६ निवासी साढे दुई वर्षे बालक हेमन्त विष्टको मृत्यु भएको जिल्ला प्रहरी कार्यालय दाङले जानकारी जानकारी दिएको छ ।
उपक्षेत्रीय अस्पतालमा मृत्यु भएकामध्य दुईजना महिलाको अझै सनाखत हुन सकेको छैन । दुर्घटनामा २९ यात्रु घाइते भएका थिए । घाइते मध्य २३ जनालाई उपक्षेत्रीय अस्पताल राप्तीले थप उपचारका लागि बाहिरी जिल्लामा पठाएकोे छ । त्यसैगरी बाक्लो तुवाँलो र ओभर स्पिटका कारण दुर्घटना भएको प्रहरीले जनाएको छ ।
