जनकपुरधाम, २२ पुस ।
लामो समयदेखिको बन्द हडतालको कारण सरकारी अनुदानको प्याजको बीउ बिक्री प्रभावित भएको छ ।
सरकारले जिल्ला कृषि विकास कार्यालय धनुषामार्फत किसानलाई ५० प्रतिशत अनुदानमा प्याजको बीउ उपलब्ध गाराउँदै आएपछि बन्द हडतालका कारण बीउ बिक्री ९० प्रतिशतले प्रभावित भएको हो ।
मङ्सिरदेखि पुस महिनाभरी प्याजको बीउ राख्ने समय भए पनि सरकारले तोकिएको समयमा उपलब्ध नगराई अनियमित समयमा बीउ उपलब्ध गराएका कारण बिक्री प्रभावित भएको कार्यालयका प्राविधिक सहायक अमृतलाल कर्णले जानकारी दिनुभयो ।
समयमै बीउ नपाउँदा किसान सीमावर्ती भारतीय बजार तथा स्थानीय एग्रोभेट पसलबाट महंँगोमा खरिद गरिरहेका छन् । कार्यालयले अहिले किसानलाई प्रतिकिलो बीउ रु ६०० का दरले उपलब्ध गराउँदै आएको छ । नासिक रेड प्याजको बीउ वितरण गर्दै आए पनि किसान आकर्षित हुन सकिरहेका छैनन् ।
जिल्लामा केही ठाउँमा यसको व्यावासयिकखेती गरिए पनि शीतभण्डारको समस्या रहेको छ । सरकारले उपलब्ध गराएको अनुदानको प्याजको बीउमा समेत कालोबजारी हुने गरेको किसानको आरोप छ ।
पौडेश्वर– ९ भराखका किसान कौशलेन्द्र मिश्र कार्यालयबाट दिँदै आएको युवा स्वरोजगार कार्यक्रमको रकममा समेत अनियमितता भएको बताउनुहन्छ । “अनुदानको प्याजको बीउ कर्मचारीले नक्कली प्रतिवेदन खडा गरी स्थानीय एग्रोभेट पसलमा बेच्ने गरेका छन्” उहाँले भन्नुभयो । भारतीय बजारदेखि ल्याएको बीउ कमसल र गुणस्तरीय नहुँदा समेत किसान मारमा परेका छन् ।
जिल्लामा किसानले गतवर्ष ९२३ हेक्टर क्षेत्रफलमा प्याजखेती गरी ११ हजार २२० मेट्रिक टन उत्पादन गरेका थिए । सरकारले अहिले युवालाई वैदेशिक रोजगारमा जानबाट रोक्नका लागि युवा लक्षित व्यावसायिक तरकारी उत्पादन कार्यक्रममार्फत एउटा किसानलाई दुई बिघा तरकारीखेती गर्न रु ६० हजार उपलब्ध गराउने गरेको छ ।
तर सो रकम पनि पहुँचवालाले नै पाउने गरेको किसानको गुनासो छ । हाल बजारमा प्याज प्रतिकिलो रु ४० देखि रु ६० सम्ममा बिक्री भइरहेको छ ।
