धरान सुनसरी पौष २१/ चार महिना अगाडि देखि भारतले गरेको नाकाबन्दी र मधेशी मोर्चाले लगातार गरेको आन्दोलनका कारण सबैभन्दा बढी धरानका होटल व्यवसायी मारमा परेको ब्यबसायीहरुले गुनासो गरेका छन ।
आज सम्पन्न होटल एसोसियन अफ धरानको १८ औ साधारण सभालाई सम्बोधन गर्दै होटल एसोसिएसन अफ धरानका सचिव श्याम पोख्रेले ग्यास लगायत होटलमा चाहिने अत्यावश्यक सामाग्री भारतदेखि आउन नसक्नु र आन्तरिक तथा वाह्य पर्यटकको चहलपहल नबढ्नाले ५० प्रतिशत भन्दा बढी होटल व्यवसायी व्यवसाय नै छोडेर विस्थापित हुन बाध्य भएको बताउनुभयो ।
सरकारले समेत यस्तो अवस्थामा ध्यान दिन नसक्दा आफूहरु बढी मारमा परेको उहा“ले बताउनुभएको छ ।
त्यस्तै सोही कार्यक्रमलाई सम्बोधन गर्नुहुदै होटल व्यवसायी महासंघका केन्द्रीय सदस्य एवम् पर्यटक व्यवसायी महेन्द्र प्रधानले व्यवसायीहरुले विगतमा गरेको लगानी डुबेर ऋण तिर्न नसकी व्यवसाय छोडेर भाग्न बाध्य हुने अवस्था आइसकेको बताउनुभयो ।
उहाले सरकारले विगतका लिएका ऋणको व्याज मिनाहा गरी सहयोग गरेमा जसोतसो गरी व्यवसाय टिकाउन सजिलो हुने बताउनुभयो ।
कार्यक्रम प्रस्तुत गरिएको प्रतिवेदनमा धरानमा साना ठूला गरी ८ सय वटा होटल सञ्चालनमा रहेको र यी मध्ये एसोसिएसनमा १ सय ३० वटा दर्ता रहेको उल्लेख समेत गर्नु भयो ।यसैबीच धरान १५ रिक्रेसन प्रा.लि.म होटल एसोसियन अफ धरानको १८ औं साधारणसभा बाट पुनः सुवर्ण श्रेष्ठलाई नै सर्वसम्मत ढंगले चयन गरिएको छ ।साधारणसभाबाट बरिष्ठ उपाध्यक्षमा सरोज भट्टराई, उपाध्यक्षमा उमेश मास्के, सचिवमा सचिन्द्र राई र जनसम्पर्क अधिकारीमा मदन कार्की चयन हुनु भएको छ ।
यस्तै सदस्यहरुमा सुरेन्द्र प्रधान, बासुदेव बराल, कृष्णप्रसाद भट्टराई, रोजन रनपहेँली, भक्तराज राई, दिनेश भुजेल, ललित राई र नविन कुमार श्रेष्ठ रहनु भएको छ । १७ सदस्यीय कार्यसमितिमा महासचिव र कोषाध्यक्ष भने चयन हुन बाकी रहेको छ ।
धरान १५ रिक्रेसन प्रा.लि.मा भएको १८ औं साधारणसभा तथा ९ औ अधिवेशनको उद्घाटन अञ्चल प्रहरी कार्यालयका प्रमुख एसएसपी पवनप्रसाद खरेलले गर्नुभएको थियो ।
एसोसिएसनका अध्यक्ष सुवर्ण श्रेष्ठको अध्यक्षतामा भएको सो कार्यक्रममा महासचिव उमेश मास्केले महासचिवको प्रतिवेदन प्रस्तुत गर्नुभएको थियो । कार्यक्रमको सञ्चालन भने सचिव श्याम पोख्रेलले गर्नुभएको थियो ।
