काठमाडौ १९ मंसिर ।
एसियन फुटबल कनफेडेरेशन एएफसीले म्याच फिक्सिङको आरोपमा कप्तान सागर थापा सहित पाँच नेपाली खेलाडीमाथि आजीवन प्रतिबन्ध लगाएको छ ।
एएफसीको अनुशासन कमिटीले खेल मिलेमतोको आरोप लागेका नेपाली फुटबल टिमका कप्तान सागर थापा, उपकप्तान सन्दिप राई, गोलकिपर रितेश थापा, विकास सिंह क्षेत्री र अन्जन केसीलाई आजीवन प्रतिबन्ध लगाएको हो ।
पाँच खेलाडीले एएफसीको अनुशासन संहिताको धारा ६२ र ६९ उल्लंघन गरेको पाइएको भन्दै आजीवन फुटबल सम्बन्धी कुनैपनि गतिविधिमा संलग्न हुन नपाइने गरी प्रतिबन्ध लगाएको एएफसीले जनाएको छ ।
उनीहरुले सन् २००८ देखि २०१२ सम्मका विभिन्न खेलमा नियम उल्लंघन गरेर म्याचफिक्सिङ गरेको एएफसीले जनाएको छ । एक वर्ष लामो अनुसन्धनबाट दोषी पाइएपछि खेलाडीमाथि आजीवन प्रतिबन्ध लगाइएको एएफसीले उल्लेख गरेको छ ।
प्रहरीले गत असोज २७ गते पाँच खेलाडीलाई खेल मिलेमतोको आरोपमा पक्राउ गरेको थियो । उनीहरु गत कात्तिक २४ गते धरौटीमा रिहा भएका थिए ।
एएफसीले ताजकिस्तानका रेफ्रि मुर्ताजोभ परवेजलाई पनि खेल मिलेमतोमा संलग्न भएको आरोपमा आजीवन प्रतिबन्ध लगाएको छ ।
