काठमाण्डौ, १८ मंसिर ।
फिफामा भ्रष्टाचारविरुद्धको कारवाहीमा थप दुई उच्च अधिकारी पक्राउ परेका छन् ।
हिजोमात्रै स्विट्जरल्याण्डमा फिफाका दुई उच्च अधिकारीलाई पक्राउ गरिएको छ भने अमेरिकामा थप १६ अधिकारीविरुद्ध मुद्दा दायर गरिएको छ ।
फिफा अध्यक्ष सेप ब्लाटर, महासचिव जेरोमी भाल्के, युरोपियन फुटबल प्रमुख मिचेल प्लाटिनीलगायतका केही उच्च अधिकारीहरुमाथि यसअघि नै विभिन्न मुद्दामा कारवाही भइरहेको छ ।
अमेरिकाको वासिङ्टनस्थित न्याय विभागद्वारा जारी गरिएको विज्ञप्ति अनुसार पछिल्लो पटक थप १६ जनाविरुद्ध भ्रष्टाचार, सम्पत्ती शुद्धिकरण र संस्थागत जालसाझीलगायतका मुद्दा दायर गरिएको हो ।
मुद्दा दायर गरिएका अधिकारीहरुमा ब्राजिलियन फुटबल संघका अध्यक्ष मार्को पोलो डेल नेरो, पूर्व अध्यक्ष रिकार्डो टेक्सेरालगायत दक्षिण अमेरिका, उत्तर अमेरिका तथा क्यारेवियन राष्ट्रका वर्तमान एवम् पूर्व फुटबल पदाधिकारीहरु रहेका छन् ।
अमेरिकी न्याय विभागले पछिल्लो डेढ दशकमा विश्व फुटबलमा २० करोड अमेरिकी डलरभन्दा बढी अनियमितता भएको आरोपमा ब्यापक छानविन चलाइरहेको छ ।
