काठमाडौं, १५ मंसिर ।
फिफा बालोन डी’ओर २०१५ का लागि क्रिष्टियानो रोनाल्डो, लियोन मेस्सी र नेइमार भिड्ने भएका छन ।
फुटबलको सर्बोच्च निकाय बालोन डी’ओर २०१५ का लागि मनोनयनमा परेका खेलाडीबाट तीन खेलाडीको अन्तिम सूची सार्वजनिक गरेको छ ।
सूचीमा गत वर्षका विजेता रियल मड्रिडका रोनाल्डो, चार पटकका विजेता बार्सिलोनाका मेस्सी र बार्सिलोना कै नेइमार परेका छन् । आगामी सन् २०१६ को जनवरी ११ मा स्वीजरल्याण्डको ज्यरिचमा हुने समारोहमा विजेताको घोषणा गरिने छ ।
फिफाले हरेक वर्ष विश्व वर्ष खेलाडीलाई बालोन डी’ओर प्रदान गर्ने गरेको छ । रोनाल्डो तीन तथा मेस्सी चार पटक वर्ष खेलाडी घोषित भइसकेका छन् भने यस वर्ष नेइमारले बालोन डी’ओर जितेमा पछिल्लो सात वर्षदेखि रहँदै आएको रोनाल्डो–मेस्सीको क्रम भंग हुनेछ ।
बालोन डी’ओरको विजेता मनोनयनमा परेका खेलाडीका टिमका कप्तान तथा मुख्य प्रशिक्षकको मत तथा फ्रेन्च प्रकाशक फ्रान्स फुटबलले छनौट गरेका अन्तर्राष्ट्रिय खेल पत्रकारको मतबाट छनौट गरिने छ ।
