धनगढी, १० मंसिर ।
नेपाली चलचित्रमा प्रवेश गर्नेहरूको संख्या वढिरहेका बेला सुदूरपश्चिम क्षेत्रबाट पनि नयाँ अनुहारहरू चलचित्रमा देखिन थालेका छन् । केही समयको पर्खाईपछि कैलालीका अत्तरिया नगरपालिका एक युवक पनि नयाँ चलचित्र ‘रन अन गन’ मार्फत नेपाली रजतपटमा आउन लागेका हुन ।
गोल्डेन हिल्स पिक्चर्सको ब्यानरमा निर्माण हुन थालेको बहुप्रतिष्ठिीत चलचित्र ‘रन अन गन’ मार्फत नव नायकका रुपमा अत्तरिया–१३ का २७ वर्षीय प्रकाशजंग शाह नेपाली चलचित्रको पर्दामा देखिन लागेका हुन् ।
यस अघि १ सय जति छोटा तथा लघु चलचित्रमा काम गरिसकेका शाह ठूलो पर्दामा पहिलो पटक देखिन लागेका छन् । ओस्कर कलेज अफ फिल्म स्टडिजबाट स्नातक गरेका शाह लामो समयको मिहिनत र परिश्रमपछि चलचित्रको पर्दामा आउन लागेका हुन ।
देशका विभिन्न भागहरूसँगै युरोपका विभिन्न देशमा अधिकांश छायाँकन हुने चलचित्रलाई मुकुन्द भट्टले निर्देशन गर्ने छन् । यस अघि केही गीतहरुका म्युजिक भिडियोमा समेत अभिनय गरिसकेका शाह एक वर्षदेखि सोही चलचित्रको तयारीमा जुटेका छन् ।
आगामी महिनामा छांयाकन सुरु हुने चलचित्र आफ्नो करियरको टर्निङ प्वाईन्ट हुने शाहले बताए । मार्सल आर्टसको जितकुण्डोमा ब्ल्याक बेल्ट गरेका उनले ६ वर्षदेखि नृत्य समेत सिकिरहेका छन् । अत्तरियाको रविन कला केन्द्रमा नृत्यसँगै सडक नाटक गर्दा गर्दै रंगीन दुनियाको सपना देखेका शाहले पहिलो चलचित्र सफल हुने विश्वास व्यक्त गरे ।
