काठमाडौं,९ मंसिर । सुनसरीको भण्टाबारीमा भारतीय सीमा सुरक्षा बलको गोली लागि घाइते भएका चारजना नेपाली नभएको भारतीय दूतावासले दाबी गरेको छ ।
आज अपरान्न एक वक्तव्य जारी गर्दै भारतीय दुताबासले नेपाली भूभागमा एसएसबीले गोली प्रहार नगरेको दाबी गरेको छ । चार नेपाली घाइते भएको सन्दर्भमा तथ्य तोडमोड गरी स्थिति आफ्नो पक्षमा पार्नेगरी दुताबासले वक्तव्य जारी गरेको छ ।
भारतीय दुतावासले निकालेको यो वक्तव्य झुटो भएको सुरक्षा स्रोतले जनाएको छ । भारतीय प्रहरीले गोली हाने पछि नेपाली अधिकारीहरुलाई नेपालीलाई गोली हानेको संकेत दिएको समेत स्रोतको दावी । नेपालको सार्वभौम सत्तालाई चूनौती दिने गरी भएको यस घटनाको सर्बत्र निन्दा गरिएको छ ।
भारतीय सुरक्षाकर्मीले प्रहार गरेको गोली लागेर हरिपुर ७ का अशोक यादव, मनोज यादव, सरोज यादव र नरेस यादव घाइते भएका थिए। दूतावासले एक पटक मात्र हवाइ फायर गरेको उल्लेख गरेको छ।
घटनाका पीडितले आफूहरु निर्दाेष भएको बताउँदै तस्कर खोज्दै आएका भारतीय सुरक्षाकर्मीले आगो तापिरहेको अवस्थामा गोली प्रहार गरेको बताएका छन । काठमाडौंबाट भारतीय दूतावासले जारी गरेको वक्तव्यमा घटना भारतीय भूभागमा भएको दाबी गरिएको छ।
