काठमाण्डौ, ५ मंसिर ।
एघारौँ इन्टरनेसनल ओपन फ्रेन्डसिप तेक्वान्दो च्याम्पियनसिपका लागि नेपालबाट पाँच खेलाडी छनोट भएका छन् ।
लगनखेलस्थित सैनिक शारीरिक तालिम तथा खेलकुद केन्द्रमा आज भएको प्रथम राष्ट्रिय फ्रेन्डसिप तेक्वान्दो च्याम्पियनसिपको ग्रान्ड फिनालेमा पहिलो भएका तीन पुरुष र दुई महिला खेलाडीले आगामी २०१६ को अक्टोबरमा अमेरिकाको पोर्टल्यान्डमा हुने सो प्रतियोगितामा सहभागिता जनाउने छन् ।
मैत्री तेक्वान्दो डोजाङ, सगरमाथा तेक्वान्दो डोजाङ र युनिभर्सल युनाइटेड नेप्लिज तेक्वान्दो फेडेरेसन नेपालद्वारा संयुक्त आयोजित छनोटमा पुरुष ८० केजीमुनि रोजिन सिंह, ७८ केजीमुनि प्रेमबहादुर नेपाली तथा ५८ केजीमुनि माधव तिमिल्सिनाले अमेरिकामा हुने प्रतियोगितामा छनोट हुन सफल भए ।
त्यस्तै महिलाको ४९ केजीमा पार्वती मगर र ५७ केजीमा रञ्जना थापा छनौट भएका थिए ।
पुरुषमा माधव र महिलामा रञ्जना उत्कृष्ट खेलाडी चुनिँदै समान रु १५÷१५ हजार नगदबाट पुरस्कृत भए । उत्कृष्ट प्रशिक्षक घोषित भएका बाबुराजा व्यञ्जनकारले रु १० हजार नगद पुरस्कार प्राप्त गरे ।
छनोटको प्रत्येक तौल समूहमा उपविजेता बनेका रोशन, अशोक, राजेश, निशा र सोनीले समान रु १०÷१० हजार नगद पुरस्कार प्राप्त गरे ।
युवा तथा खेलकुद मन्त्री सत्यनारायण मण्डललगायतले विजेतालाई पुरस्कार वितरण गर्नुभयो ।
