काठमाडौ २ मंसिर । सरकारले काठमाडौं उपत्यकामा बिरामी र अशक्तलाई लक्षित गरी निःशुल्क बस संचालन गर्ने तयारी गरेको छ ।
इन्धन अभावका कारण सार्वजनिक गाडी कम चल्दा यात्रुलाई कठिनाइ भएको भन्दै सरकारले अस्पताल आसपास निःशुल्क गाडी चलाउने तयारी गरेको सामान्य प्रशासन मन्त्रालयका प्रवक्ता राजेन्द्र पौडेलले जानकारी दिनुभयो ।
त्यसका लागि आज सचिवस्तरिय छलफल हुदैछ । उत्यकामा रहेको गंगालाल अस्पताल बाँसबारी, शिक्षण अस्पताल महाराजगंज, वीर अस्पताल रत्नपार्क, निजामति अस्पताल बानेश्वर, पाटन अस्पताल लगनखेल र भक्तपुर क्यान्सर अस्पताल भक्तपुरका बिरामीलाई सहज हुनेगरी उक्त रुटमा निःशुल्क गाडी चलाउने तयारी भइरहेको पौडेलको भनाई छ ।
यसअघि तिहार र छठ पर्वलाई मध्यनजर गर्दै सरकारले विभिन्न रुटमा १२ वटा निःशुल्क बस चलाएको थियो । यस्तै इन्धन अभाव भएपछि नेपाली सेना, नेपाल प्रहरी, सशस्त्र प्रहरी लगायतका निकायले पनि विभिन्न रुटमा निःशुल्क गाडी चलाइरहेका छन् ।
