काठमाडौं, २९ कार्तिक ।
भारतको गुहाटी र सिलोङ्गमा आउँदो वर्ष आयोजना हुने दक्षिण एशियाली खेलकुद प्रतियोगितालाई मध्येनजर राख्दै नेपाल ट्राइयाथलन संघले डेनिस प्रशिक्षक पिटर ज्याकोवसनलाइ राष्ट्रिय प्रशिक्षकको रुपमा नियुक्त गरेको छ ।
कास्कीको वेगनाश तालमा भएको सातौ राष्ट्रिय प्रतियोगिता अन्तरगत चौथौं राष्ट्रिय ट्राइयाथनल प्रतियोगिताबाट सागको लागि छनोट भएका खेलाडीहरुलाई बन्द प्रशिक्षणमा राखी उत्कृष्ट नतिजा ल्याउने उद्देश्यले डेनिस प्रशिक्षक पिटरलाई राष्ट्रिय प्रशिक्षकको रुपमा नियुक्त गरिएको संघद्वारा जारी बिज्ञप्तीमा जनाइएको छ ।
५१ वर्षे प्रशिक्षक ज्याकोवसन ट्राइयाथनल प्रशिक्षकका साथ साथै शारीरिक र मानसिक प्रशिक्षणका ज्ञाता मानिन्छन् ।
उनी आफ्नो जमानाका उत्कृष्ट खेलाडी हुनुका साथै ट्राइयाथनलका निकै अनुभवी प्रशिक्षक समेत हुन् ।
उनले डेनमार्क, जर्मनी, जिम्वाब्वे, म्यानमार, सिङ्गापुर र कम्वोडियामा प्रशिक्षकको रुपमा रहेर काम गरिसकेका छन् ।
हाललाई साग सम्मको सम्झौता भएता पनि नेपाली ट्राइयाथलनलाई उत्कृष्ट बनाउनको लागि आगामी २ देखि ४ बर्षसम्म ज्याकोवसनलाई नेपाली राष्ट्रिय प्रशिक्षकको रुपमा नेपालमा राख्न पहल गर्ने संघले जनाएको छ ।
