काठमाडौ २३ कार्तिक ।
न्युजिल्याण्ड बिरुद्ध ३ खेलको टेष्ट क्रिकेटमा अष्ट्रेलियाले १–० को अग्रता लिएको छ । आज सम्पन्न खेलमा २ सय ८ रनको विशाल जित निकाल्दै अष्ट्रेलियाले टेष्टमा अग्रता लिएको हो ।
५ सय ४ रनको विशाल विजयी लक्ष्य पछ्याएको पाहुना टोली न्युजिल्याण्ड टेष्टको पाँचौ तथा अन्तिम दिन आज २ सय ९५ रनमा अलआउट भयो ।
गत बिहीबारदेखि सुरु भएको पहिलो टेष्टमा टस जितेर पहिले ब्याटिङ रोजेको घरेलु टोली अष्ट्रेलियाले आफ्नो पहिलो इनिङमा शानदार ब्याटिङ गर्दै मात्र ४ विकेटको क्षतिमा ५ सय ५६ रन जोडेको थियो ।
जवाफमा न्युजिल्याण्डले आफ्नो पहिलो इनिङमा ३ सय १७ रन मात्र बनाउन सकेपछि अष्ट्रेलियाले २ सय ३९ रनको अग्रता लियो ।
अष्ट्रेलियाले आफ्नो दोस्रो इनिङमा ४ विकेटको क्षतिमा २ सय ६४ रन बनाउँदै इनिङ समाप्तिको घोषणा गरेपछि न्युजिल्याण्डले ५ सय ४ रनको विजयी लक्ष्य पाएको थियो ।
पहिलो टेष्टको दुबै इनिङमा शतक प्रहार गरेका अष्ट्रेलियन ओपनर डेबिड वार्नर म्यान अफ द म्याच घोषित भए ।
