काठमाडौ १८ कार्तिक ।
रक्सौल नाकास्थित मितेरी पुलमा धर्नामा बसेर नाकामा अवरोध गर्दै आएका मधेशी मोर्चाका कार्यकर्तालाई भारतीय नागरिकले हातपात गरेका छन् ।
हिजो साँझ करिब ४०–५० जनाको संख्यमा आएका भारतीय नागरिकले धर्नास्थल मितेरी पुलमै पुगेर मोर्चाका कार्यकर्तामाथि हातपात गरेको बताइएको छ ।
रक्सौलबाट लाठी र भाटा सहित आएका समुहले धर्नामा बसेका मोर्चाका नेता तथा कार्यकर्तालाई गाली गलौज गर्नुका साथै दुव्र्यवहार गरेको नेपाल सद्भावना पार्टीका केन्द्रिय सदस्य शिव पटेलले बताउनु भयो ।
मोर्चाको आन्दोलनका क्रममा सोमबार बिरगन्जमा भएको झडपमा प्रहरीको गोली लागेर भारतीय नागरिक आशीष कुमार रामको मृत्यु भएपछि आक्रोसित रक्सौल बासिन्दाले धर्ना स्थलमै पुगेर मोर्चाका कार्यकर्तामाथि हातपात गरेका हुन् ।
इमान्दारी पूर्वक आन्दोलनमा नलागेको भन्दै उनीहरुले मोर्चाका नेतालाई अब धर्नामा बस्न नदिने चेतावनी समेत दिएका छन् ।
यसैबीच मितेरी पुलमा धर्नामा बसेका मोर्चाका कार्यकर्ताका लागि भारतीय व्यापारीले सन्चालन गर्दै आएको निशुलक मेस पनि बन्द गरिएको छ ।
सोमबार बिरगन्जमा प्रदर्शनकारी र प्रहरीबीच भएको झडपका क्रममा भारतीय नागरिकको मृत्यु भएपछि झन्डै एक हजार आन्दोलनकारीले खाना खाँदै आएको मेस बनद गरिएको हो ।
