काठमाडौँ, १७ कात्तिक । पशुपति क्षेत्र विकास कोषको दैनिक आम्दानी रकम सार्वजनिक हुने भएको छ ।
सुशासन, पारदर्शीताको क्षेत्रमा विगत १० वर्षदेखि क्रियाशील सञ्चारकर्मीको संस्था भरोसा नेपालको अग्रसरतामा कोषको रकम सञ्चारमाध्यमबाट सार्वजनिक गर्न लागिएको हो ।
आज पशुपति क्षेत्र विकास कोष र भरोसा नेपालबीच रकम सार्वजनिक गर्ने विषयमा सम्झौता भएको छ । सम्झौतापत्रमा कोषका तर्फबाट नवनियुक्त सदस्यसचिव सरेश नेपाल र भरोसा नेपालका तर्फबाट अध्यक्ष शिव अधिकारीले हस्ताक्षर गर्नुभएको हो । सम्झौताअनुरुप कोषको आम्दानी भरोसा नेपालले दैनिकरुपमा न्यूज २४ टेलिभिजनमा सञ्चालन गरिरहेको दैनिक टेलिभिजन कार्यक्रम ‘डेभलपमेन्ट फोरम’मा सार्वजनिक हुनेछ ।
सम्झौतापछि कोषका सदस्यसचिव सरेश नेपालले पशुपतिमा चढाएको भेटी सार्वजनिक गर्ने कार्यको थालनीले जनतामा रहेका आशङ्का निवारण गर्न केही हदसम्म मद्दत पुग्ने विश्वास लिएको बताउनुभयो ।
भरोसा नेपालका अध्यक्ष अधिकारीले कोषको आम्दानी सार्वजनिक गर्दै कोषलाई थप उत्तरदायी र पारदर्शी बनाउने उद्देश्यका साथ सञ्चारमाध्यमबाट आम जनतालाई सुसूचित गर्नु आफ्नो दायित्व सम्झिएर निःशुल्करुपमा काम गर्नेगरी सम्झौता गरिएको जानकारी दिनुभयो ।
