काठमाडौं, १७ कार्तिक ।
वीरगंजमा स्थानीय प्रशासनले लगाएको कफ्र्यु उलंघन गरेर प्रर्दशन गर्न खोज्दा प्रहरीले ३ राउण्ड हवाइ फायर गरेको छ ।
आज विहान ब्रह्म चौकमा मोर्चाका कार्यकर्ताहरुले प्रर्दशन सुरु गरेपछि प्रहरीले ३ राउण्ड हवाइ फायर गरेको हो । हवाइ फायर पछि आन्दोलनकारी तितर वितर भएका छन्।
संयुक्त लोकतान्त्रिक मधेसी मोर्चा र प्रहरीबीच हिजो नाका खुलाएको विषयलाई लिएर भएको झडपमा प्रहरीले चलाएको गोली लागेर भारत रक्सौलका २० वर्षीय आषिस रामको ज्यान गएपछि स्थानीय प्रशासनले हिजो अपराह्न ३ बजेदेखि अर्को आदेश नहुन्जेल सम्म लगाएको कर्फ्यु जारी गरेको छ ।
मितेरी पुलमा मोर्चाका कार्यकर्ताले विगत चालिस दिनदेखि नाका ठप्प पार्दै जारी धर्नामा प्रहरीले हिजो विहानै हस्तक्षेप गरी नाका सुचारु गरेको थियो ।
त्यसैकोे विरोधमा मोर्चाका कार्यकर्ताले प्रहरी कार्यालयमा आक्रमणको प्रयास गरेपछि भएको झडपमा १० सुरक्षाकर्मी सहित दुईदर्जन आन्दोलनकारी घाइते भएका थिए ।
झडपले उग्ररुप लिएपछि स्थानीय प्रशासनले कर्फ्यु लगाउनु परेको पर्साका प्रमुख जिल्ला अधिकारी केशव राज घिमिरेले जानकारि दिनुभयो ।
