काठमाडौं, कार्तिक १० ।
फुटबलको सर्वोच्च निकाय फिफाको अध्यक्ष पदका लागि ९ जनाले उम्मेदवारी दिएका छन् । फिफाको नयाँ नेतृत्वका लागि उम्मेदवारी घोषणा गर्ने समय सकिएसँगै अध्यक्षमा ९ प्रत्याशी देखा परेका हुन् ।
आर्थिक अनियमितता, भ्रष्टाचार र सम्पत्ति शुद्धिकरण लगायतका मुुद्दामा फिफाको वर्तमान नेतृत्वपंक्ति मुछिएपछि फिफामा नेतृत्वको संकट चुलिएको छ ।
यस्तो अवस्थामा अध्यक्ष सेप ब्लाटरले पद त्याग्ने घोषणा गर्दै आगामी फेबु्रवरीमा विशेष साधारणसभा बोलाएका छन् । ज्युरिचमा हुने साधारणसभाले फिफाको नयाँ नेतृत्व चयन गर्नेछ ।
फिफा अध्यक्षका लागि युरोपियन फुटबल महासंघ युएफाका महासचिव जियानी ईन्फान्टीनोले उम्मेदवारी दिएका छन् । यस्तै जोर्डनका राजमुकार अली बीन अल हुसैन, एसियाली फुटबल महासंघ एएफसीका अध्यक्ष शेख सलमान बिन ईब्राहिम अल खालीफाले पनि अध्यक्षका लागि उमेदवारी दिएका छन् ।
यसैबीच दक्षिण अफ्रिकाका टोक्यो सक्सवेल, ट्रिनिडाड एण्ड टोबागोका डेभिड नाखिद, फिफाका पूर्व पदाधिकारी जेरोमी स्याम्पेन, लाईबेरियन फुटबल संघका अध्यक्ष मुसा बिलीटी र नाईजेरियाका सेगुन ओडेग्बाकीले पनि फिफा अध्यक्षमा उम्मेदवारी दिने घोषणा गरेका छन् ।
सबै उम्मेदवारले कम्तिमा ५ सदस्य राष्ट्रको लिखित समर्थन जुटाउनुपर्ने फिफा विधानमा उल्लेख छ । फिफाले उम्मेदवारहरुको मनोनयन सुची भने सार्वजनिक गरेको छैन ।
