काठमाण्डौ,६ कात्तिक ।
मलेसियामा सम्पन्न आइसीसी अन्डर १९ विश्वकप छनोटमा विजयी भएको नेपाली टोली आज स्वदेश फिर्ता भएको छ । मध्यान्ह साढे १२ बजे आएको नेपाली टोलीलाई नेपाल क्रिकेट संघ क्यानका पदाधिकारीहरुले स्वागत गरेका थिए ।
नेपालले हिजो भएको खेलमा आयरल्यान्डलाई तीन विकेटले पराजित गर्दै आगामी वर्ष बङ्गलादेशमा हुने आइसिसी यु(१९ विश्वकप विश्वकपका लागि छनोट भएको हो ।
मुलुकको क्रिकेट खेलको इतिहास रचना गर्दै फर्केको नेपाली टोलीका कप्तान राजु रिजालले त्रिभुवन अन्तर्रा्ष्ट्रिय विमानस्थलमा संचारकर्मीसंग कुरा गर्दै टीमको कडा मेहनत र एक अर्काको सहयोगले बिश्बकप खेल्ने सपना पुरा हुने बताए ।
प्रतिस्पर्धा कडा भए पनि नेपाली टोलीको आपसी सहयोग र कडा मेहनतका साथ खेलेकाले अहिलेको सफलता आएको भन्दै उनले विश्वकपमा राम्रो नतिजा ल्याउन अझै कडा मेहनत चाहिने बताएका छन ।
नेपाली टोलीका प्रशिक्षक जगत टमटाले नेपाली टोलीका लागि अहिले राम्रो अवसर आएको र अझै राम्रो अभ्यास गरेमा जित नेपालको पक्षमा आउने बताए । प्रशिक्षक टमाटाले छनौट चरणको पाँचवटा प्रतियोगितामा आयरल्याण्ड टप प्रतियोगी भएपनि नेपाली टीमले राम्रो खेलेको भन्दै ब्याटिङमा सुधार गर्न आबश्यक रहेको बताए ।
छनोट चरणमा पाँच टीम नेपाल, आयरल्याण्ड, अमेरिका, युगाण्डा र पपुवा न्युगिनीले प्रतिस्पर्धा गरेका थिए ।
