काठमाडौँ, ५ कात्तिक ।
काठमाडौँको हनुमानढोका नजिकै रहेको तलेजु मन्दिरमा आज कुमारीलाई दर्शन गराइएको छ । प्रत्येक वर्ष आश्विन शुक्ल दिन कुमारीले दर्शन गर्ने परम्परा छ ।
कुमारी घरबाट विधिविधानपूर्वक कुमारीलाई तलेजु भवानीको दर्शनका लागि लगिएको गौतमरत्न शाक्यले जानकारी दिनुभयो । यसवर्ष नवमी र दशमीको तिथि आजै परेको छ ।
वर्ष दिनमा एक दिनमात्र नवमीको दिन आज देवीको दर्शन सर्वसाधारणलाई समेत खुल्ला गरिने परम्परा अनुसार आज त्यहाँ विशेष मेला लागेको छ । मन्दिरमा मुल प्रवेशद्वारबाट भक्तजनलाई दर्शनको लागि व्यवस्था मिलाइएको भए पनि यसपटक बसन्तपुर नजिकैबाट उनीहरुलाई बाहिर निकालिएको छ ।
भूकम्पका कारण मन्दिर क्षेत्रमा जोखिम रहेकाले दर्शन गर्न आएका भक्तजनलाई यसवर्ष दर्शन गरी फर्कने मार्ग परिवर्तन गरिएको हनुमानढोका दरवार हेरचाह अड्डाका कर्मचारी साधुराम पुडासैनीले जानकारी दिनुभयो ।
मन्दिर आसपास क्षेत्रमा आउने भक्तजनलाई साँझ ५ः०० बजेसम्म दर्शनको व्यवस्था गरिएको छ ।
