काठमाडौं, ४ कार्तिक ।
रुपन्देहीको बेलहिया नाकाको अवरोध हटेको छ ।
आफ्ना दुई जना नागरिक कुटिएको विरोधमा भारतीय पक्षले आज विहान देखि बेलहिया नाका ठप्प बनाएको थियो ।
कुटपिटमा संलग्न युवालाई कारवाही गर्ने सहमती भएपछि नाका केहिबेरअघिबाट सुचारु भएको हो । नाकामा अवरोध हुँदा भारतबाट नेपाल आउने पैदल यात्री बाहेक सवारी साधन ठप्प भएका थिए ।
दुवै पक्षका युवाबिच हुनसक्ने सम्भावित झडपलाई ध्यान दिएर बेलहियामा सुरक्षा अवस्था कडा पारिएको जिल्ला प्रहरी कार्यालय रुपन्देहीका प्रहरी नायव उपरिक्षक रामेश्वर कार्कीले जानकारी दिनुभयो ।
बेलहियाको सेरे पञ्जाब होटलमा मदिरा सेवन गरिरहेको अवस्थामा बेलहियाका सचिन थैव, सुनील रानाले भारतीय नागरिक अजय सिंह राजकोट, कृष्ण मुरारी मधेसीयालाई कुटपिट गरेको विषयलाई लिएर बेलहिया नाका आज विहानैबाट बन्द भएको थियो
कुटपिटबाट भारतीय नागरिक घाइते भएपछि मङ्गलबार रातिदेखि नै असहज बनेको बेलहिया नाकामा भारतीय पक्षले अहिलेसम्म कुनै पनि गाडी नेपाल प्रवेश गर्न दिएको थिएन ।
