काठमाडौं, ४ कार्तिक ।
१९ वर्षमुनिको आइसिसी विश्वकप क्रिकेट छनौट प्रतियोगिताको समूहचरणको अन्तिम खेलमा नेपालले आयरल्याण्डलाई ८ विकेटले पराजित गरेको छ ।
आयरल्याण्डले दिएको १ सय ८५ रनको लक्ष्य नेपालले ४२ दशमलव ५ ओभरमा मात्र २ विकेटको क्षतिमा पुरा गर्योे ।
नेपालका लागि ओपनर सन्दिप सुनारले ८५ र सुनिल धमलाले ७५ रनको योगदान दिए । यस्तै, राजु रिजालले १६ र योगेन्द्र सिंह कार्कीले ४ रन बनाए ।
पहिले ब्याटिङ गरेको आयरल्याण्डले निर्धा्रित ५० ओभरमा ७ विकेटको क्षतिमा एक सय ८४ रन बनाएको थियो ।
आयरल्याण्डका आरोन गिलस्पाइले नटआउट ५३ तथा ज्याक टेकटोरले ४६ रन बनाए । नेपालका प्रेम तामाङले चार, ललित राजवंशीले दुई तथा सुशिल कँडेलले एक विकेट लिए ।
जितसँगै नेपाल समूह बिजेता बन्दै फाइनल प्रवेश गरेको छ । यसअघि भएका तीन खेलमा जित निकालेको नेपालले छनौट प्रतियोगिताको फाइनलमा यसअघि नै स्थान बनाइसकेको छ ।
आउँदो वर्ष बंगलादेशमा हुने १९ वर्षमुनिको विश्वकपमा छनौट हुनका लागि भोलि नेपालले आयरल्याण्डसँग फाइनलमा प्रतिस्पर्धा गर्नेछ । विश्वकपमा छनौट हुन नेपालले भोलीको खेल जित्नुपर्नेछ ।
