काठमाण्डौ,१ कात्तिक ।
मधेसी जनअधिकार फोरम नेपाल (लोकतान्त्रिक)का महासचिव मृगेन्द्रसिंह यादवले पाटी परित्याग गरेको घोषणा गर्नुभएको छ । राजविराजस्थित आफ्नै निवासमा पत्रकार सम्मेलन गरी महासचिव यादवले पार्टी परित्यागको घोषणा गर्नुभएको हो ।
यादबसहित करिब दुई सयभन्दा बढी पदाधिकारी तथा नेता एवम् कार्यकर्ताले साधारण सदस्यतासमेत नरहने गरी पार्टी परित्याग गरेका छन ।
सीमाङ्कनसहितको संघीय संविधानका लागि सुरु भएको थरुहट–मधेस आन्दोललाई नै समाप्त पार्ने गरी आत्मघाती कदमस्वरुप पार्टी अध्यक्षले केन्द्रीय कार्यसमितिलाई कुनै आधिकारिक जानकारी नदिई एकलौटी ढंगले सत्ताको लोभमा सरकारमा सहभागी भएको भन्दै यादवसहित पार्टीका कार्यकर्ताले पार्टी परित्याग गरेको बताइएको छ ।
यादवले आफ्नै पार्टीका अध्यक्ष मधेस विरोधी भएको भन्दै पार्टीका केन्द्रीय समिति, जिल्ला समिति, निर्वाचन क्षेत्र, राजविराज नगर समिति तथा गाउँ समितिका करिब दुई सयभन्दा बढी कार्यकर्ताले साधारण सदस्यतासमेत नरहने गरी पार्टी परित्यागको घोषणा गरेको बताउनुभयो ।
