काठमाण्डौ,३० असोज ।
परराष्ट्रमन्त्री कमल बहादुर थापा आज भारत भ्रमणमा जादै हुनुहुन्छ । पछिल्लो समय भारतले सिमानाकामा गरेको कडाइका कारण आपुर्ति सहज नहुदा समस्या भएको भन्दै त्यस विषयमा छलफल गर्न उहाँ भारत जान लाग्नु भएको हो ।
नेपालमा घोषणा भएको संविधानमा असन्तुष्टी जनाउदै भारतले गरेको अघोषित नाकाबन्दी र इन्धन आपूर्तिमा गरेको कडाईका कारण जनजीवन कष्टकर बन्दै गएको छ ।
मन्त्री थापाको भ्रमण सीमानाकामा रहेको कडाई हटाउने तथा इन्धनको सहज आपूर्तिका विषयमा केन्द्रित हुने बताइएको छ । प्रमुख समस्या अघोषित नाकाबन्दी समाधानमा भारत सकारात्मक देखिएमा मात्र अन्य विषयमा छलफल गर्ने जनाएको छ ।
यद्यपी भारतले भने गत वर्षको साउनमा दुई मुलुकका परराष्ट्रमन्त्रालयबीचमा भएको सहमतिको कार्यविवरण र कार्यसमिक्षा बोकेर आउन आग्रह गरेको छ । परराष्ट्रमन्त्रालय उच्च स्रोतका अनुसार भ्रमणको क्रममा त्यसको कार्यान्वयनको स्थितिबारे छलफल गर्ने भारतको चहाना छ ।
