काठमाडौँ, २७ असोज । मनाङ मस्र्याङ्दी क्लबले नेपाल प्रहरी क्लबलाई पराजित गर्दै राष्ट्रिय लिग फुटबल प्रतियोगिताको उपाधिको सम्भावनालाई बलियो बनाएको छ ।
सातदोबाटोस्थित एन्फा कम्प्लेक्सको खेल मैदानमा आज भएको सो प्रतियोगितामा मनाङ मस्र्याङ्दीले प्रहरीलाई १–० गोलअन्तरले पराजित गर्दै राष्ट्रिय लिग फुटबल प्रतियोगिता उपाधिको सम्भावनालाई बलियो बनाएको राखेको हो ।
प्रतियोगितामा मनाङ मस्र्याङ्दीको जितसँगै यस सिजनको लिग भने निकै रोमाञ्चक बन्ने भएको छ । मनाङ मस्र्याङ्दीसँगै उपाधि होडमा रहेका थ्रीस्टार क्लब र त्रिभुवन आर्मी क्लबमध्ये एक टोलीले उपाधिमाथि कब्जा जमाउने छन् ।
यस जितसँगै ३१ अङ्क जोडेको मनाङ मस्र्याङ्दी लिगको दोस्रो स्थानमा उक्लेको छ भने ३२ अङ्कका साथ थ्रीस्टार क्लब लिगको पहिलो स्थानमा छ । त्यस्तै आर्मी ३० अङ्कका साथ लिगको तेस्रो स्थानमा छ ।
तीनै टोलीले अब समान एक एक खेल मात्र खेल्न बाँकी छ । प्रतियोगितामा यही असोज ३० गते हुने मनाङ मस्र्याङ्दी र थ्रीस्टार क्लबबीचको खेलले विजेताको टुङ्गो लाग्नेछ ।
मनाङ मस्र्याङ्दीको जितमा अनिल गुरुङ नायक बने । उनले खेलको दोस्रो हाफमा गरेको एक गोल नै मनाङ मस्र्याङ्दीको लागि निर्णायक गोल सावित भयो । गुरुङले खेलको ५१औँ मिनेटमा गोल गरेका थिए ।
खेल अवधिभर निकै प्रतिस्पर्धात्मक बनेको खेलमा प्रहरीले खेलको ५१आँै मिनेटलाई जोगाउन नसक्दा प्रतियोगितामा हार बेहोर्न बाध्य भयो । यस हारसँगै प्रहरी उपाधि होडबाट बाहिरिएको छ । प्रहरीले जारी प्रतियोगितामा १३ अङ्क जोडेको छ ।
भोलि बिहीबार झापा फुटबल क्लब र सशस्त्र प्रहरी बल (एपिएफ)बीच खेल हुनेछ ।
