काठमाडौँ, २६ असोज ।
उपप्रधानमन्त्री तथा परराष्ट्रमन्त्री कमल थापाले देशको परराष्ट्र नीतिलाई प्रगतिशील र व्यावहारिक ढङ्गबाट अगाडि बढाउने बताउनु भएको छ ।
राजधानीमा आयोजीत कार्यक्रममा बोल्दै उहाले दुई छिमेकी मुलुक भारत र चीनसँगको बहुआयामिक सम्बन्धलाई सुदृढ तुल्याउन हरसम्भव प्रयत्न गर्ने बताउनुभयो ।
राष्ट्रिय हित र संवद्र्धन नै परराष्ट्र नीतिको आधार भएको भन्दै उहाँले जुनसुकै मुलुकको परराष्ट्र नीति निरन्तरतामा आधारित हुने स्पष्ट पार्नुभयो ।
केही समयदेखि सीमावर्ती क्षेत्रमा मधेस केन्द्रित दलले गरेको आन्दोलन र पारवहन तथा आवागमनमा भइरहेको असहजता र व्यवधानका कारण जनताले कष्ट सहनु परिरहेको उल्लेख गर्दै उहाँले कूटनीतिक माध्यमबाट यस समस्यालाई समाधान गर्ने कार्यलाई सरकारले पहिलो प्राथमिकतामा राखेको स्पष्ट पार्नुभयो ।
परराष्ट्रमन्त्री थापाले चाडपर्वका समयमा जनतालाई राहत दिने उद्देश्यका साथ सरकारले वर्तमान अवस्थामा देखिएको राजनीतिक समस्यालाई वार्ता र संवादबाट समाधान गर्न आन्दोलनरत राजनीतिक दललाई वार्तामा आउन आह्वान गरिसकेको बताउनुभयो ।
पारवहन तथा आवागमनमा देखा परेको असहज परिस्थितिको निराकरणका लागि राजनीतिक पहल र मित्रराष्ट्र भारतसँग कुरा गर्नुपर्ने बताउँदै उहाँले कूटनीतिक संवादको माध्यमबाट समस्याको समाधानका लागि पहल भइसकेको जानकारी दिनुभयो ।
