काठमाण्डौ, २६ असोज ।
महोत्तरीको गौशालामा हतियारधारी समूहबाट लाखौँको लुटपाट भएको छ ।
गौशाला नगरपालिका ८ का मनोज साहको घरमा गएराति हतियारधारीको समूहले पेस्तोल देखाई रु १० लाख बराबरको लुटपाट गरेको हो ।
घरको पछाडि बाँसको सहाराले घरभित्र पसेको सो समूहले रु पाँच लाख नेपाली, एक लाख भारु, एक थान मोबाइल, दुई तोला सुन, एक तोला चाँदी लुटपाट भएको पीडित मनोज साहले बताउनुभयो ।
समयमै प्रहरी घटनास्थलमा पुगेपछि थप लुटपाटबाट जोगिएको इलाका प्रहरी कार्यालय गौशालाले जनाएको छ । यस सम्बन्धमा थप अनुसन्धान भइरहेको र घटनामा संलग्नको खोजी कार्य जारी रहेको प्रहरी निरीक्षक चन्देश्वर यादवले बताउनुभयो ।
यसैविच भन्सार छलेर नेपाल भित्रयाउँदै गरेको अवस्थामा रु तीन लाखभन्दा बढी मूल्यको लत्ताकपडा प्रहरीले दक्षिणी झापाको कुमरखोदबाट बरामद गरेको छ ।
निवन बस्त्रालयको नाममा नेपाल भित्र्याइँदै गरेको लत्ताकपडा जिल्ला प्रहरी कार्यालय झापाबाट गएको टोलीले विशेष सूचनाका आधारमा सोमबार बरामद गरेको जिप्रका प्रहरी प्रवक्ता भीमबहादुर दाहालले बताउनुभयो ।
बरामद गरिएको सामानमा कुर्ता सुरुवाल, साडीलगायत पेन्ट, सर्ट र नेट कपडाको बन्डल रहेको प्रहरीले जनाएको छ । बरामद गरिएको सामान मेची भन्सार कार्यालय काँकडभिट्टा बुझाइएको प्रहरी प्रवक्ता दाहालले बताउनुभयो ।
