त्रिशूली (नुवाकोट), २५ असोज ।
गत वैशाखको भूकम्पले विद्यालय भत्कीएपछि समस्यामा परेको नुवाकोटको सिक्रे–७ ढुङ्गेडाँडामा रहेको स्याउरेभूमे उच्च माविलाई स्थानीय मनकारीले लाखौँको जग्गादान गरिदिएका छन् ।
आज मालपोत कार्यालय बिदुरमा आएर स्थानीय सात जना दाताले १९ रोपनी सात आना जग्गा विद्यालयको नाममा दर्ता गरिदिएका हुन् ।
सिक्रे–८ का भरतबहादुर बुढाथोकीले पुत्र महेन्द्रबहादुर बुढाथोकीको स्मृतिमा छ रोपनी र रामकुमार बुढाथोकीले चार रोपनी, वडा नं ५ का बुद्धिमान तामाङले पत्नी ठूलीकान्छीको स्मृतिमा चार रोपनी र कामी तामाङले दुई रोपनी, वडा नं ७ का मगङ्लीमाया तामाङले पति कणबहादुरको स्मृतिमा दुई रोपनी, अमृतकुमार खड्काले दाजु विष्णुबहादुरको स्मृतिमा एक रोपनी र रामकाजी बुढाथोकीले पिता पूर्णबहादुर स्मृतिमा सात आना एक पैसा दुई दाम जग्गादान गर्नुभएको विद्यालयका प्रधानाध्यापक रामहरि खड्काले बताउनुभयो ।
उक्त जग्गामा सुविधासम्पन विद्यालय भवन निर्माण गर्ने योजना रहेको प्रअ खड्काले बताउनुभयो ।
गत वैशाख १२ गतेको भूकम्पले विद्यालयको नौवटा भवनको ३२ कोठा ध्वस्त भएको थियो । दुई सय ९३ जना विद्यार्थी रहेको उक्त विद्यालय अहिले अस्थायी सिकाइ कक्षामा सञ्चालन भइरहेको छ ।
