काठमाडौं, २३ असोज ।
भारतको अघोषित नाकाबन्दीका कारण मुलुकका मुख्य भन्सार नाकाबाट आज पनि इन्धनलगायतका सामाग्रीको आयात ठप्प छ । पेट्रोलियम पदार्थले भरिएका सयौं सवारी–साधन अझै पनि भारतीय भूमिमै रोकिएका छन् ।
मुलुकको सबैभन्दा ठूलो वीरगन्ज भन्सार नाका भने आज १७ औं दिन पनि ठप्प छ । मधेसी मोर्चाका कार्यकर्ताले रक्सौलनजिकै मितेरी पुलमा धर्ना र अवरोध जारी राखेका कारण यो नाकाबाट कुनै पनि सवारी–साधन भित्रिएका छैनन् ।
उता अर्को प्रमुख नाका भैरहवाबाट ६ दिनयता कुनै पनि पेट्रोलियम पदार्थका ट्यांकर नेपाल भित्रन सकेका छैनन् ।
यसैबीच झापा र नेपालगन्ज नाका भएर एत राति २५ वटा इन्धनका गाडी नेपाल भित्रिएका छन् । झापाको काँकडभिट्टा नाका भएर १५ वटा डिजेल, चार वटा पेट्रोल र दुई वटा हवाई इन्धन बोकेका गाडी नेपाल भित्रिएका हुन् ।
यस्तै नेपालगञ्ज नाका भएर तीन वटा डिजेलका ट्याङकर र एउटा ग्यास बुलेट नेपाल प्रवेश गरेको छ । यी दुई नाका बाहेक अरु नाकाबाट भने इन्धन बोकेका गाडी भित्रिएका छैनन् ।
