काठमाडौ २१ असोज ।
सहमतीय सरकार गठनका लागि राष्ट्रपति डा. रामवरण यादवले दलहरुलाई दिनुभएको समयसीमा आज सकिदैछ ।
सहमतीय सरकार गठनको सम्भावना नभएपछि दलहरु भने बहुमतीय प्रक्रिया मार्फत धेरै भन्दा धेरै दलको समर्थनमा सरकार गठनको कसरतमा जुटेका छन् ।
मधेस केन्द्रित दलहरु आन्दोलनमा रहेका कारण सबै दलको सहमति जुट्ने अवस्था नभएपछि बहुमतीय प्रक्रियाबाट अधिकतम सहमति खोज्ने प्रयासमा दलहरु जुटेका हुन् ।
सरकारको नेतृत्वबारे दलहरुबीच मतभेद छ । एमालेले पहिले भएको भद्रसहमति अनुसार आफूले नेतृत्व पाउनुपर्ने बताउँदै आएको छ भने कांग्रेस पनि आफ्नो नेतृत्व दोहोर्याउने पक्षमा छ ।
एकीकृत माओवादीको भने सहमति अनुसार एमालेले नेतृत्व पाउनुपर्ने पक्षमा छ । नयाँ सरकार गठनका लागि भोलीबाट बहुमतीय प्रक्रिया सुरु हुनेछ । त्यसका लागि भोली व्यवस्थापिका संसदको बैठक बोलाइएको छ ।
