काठमाडौँ, २० असोज ।
आन्दोलनरत संयुक्त लोकतान्त्रिक मधेसी मोर्चाका नेता तथा सद्भावना पार्टीका सहअध्यक्ष लक्ष्मणलाल कर्णले मधेशीको माग संबोधन भएको दुई दिन भित्र नाका खुल्ने बताउनु भएको छ ।
मिडिया इन्टरनेसनलद्वारा आयोजित साक्षात्कारमा कर्णले यदी सरकारले मधेशमा जारी आन्दोलनलाई ध्यान दिने हो भने वार्ताबाट समस्या समाधान गरी दुई दिनभित्र नाका खुल्ने दावी गर्नुभयो ।
पछिल्लो पटक इन्धनलगायतमा गरिएको नाका बन्द भारतले भन्दा पनि मधेसमा भइरहेको आन्दोलनका कारण भएको उहाँको भनाइ छ । उहाले सहमतिका लागि सरकार गम्भीर नभएको धारणा राख्नु भएको छ ।
कर्णले तीन दलका प्रतिनिधिसँग दुई पटक वार्तामा बस्दासमेत सरकारको तर्फबाट ठोस प्रस्ताव आउन नसकेको बताउनुभयो ।
सङ्घीय समाजवादी फोरमका उपाध्यक्ष लालबाबु राउतले आन्दोलनका क्रममा घाइते भएकालाई निःशुल्क उपचार गर्नुपर्ने, मृतकलाई सहिद घोषणा गर्नुपर्ने र बन्दीलाई तत्काल रिहाइ गर्नुपर्ने माग गर्नुभयो ।
उहाँले वार्ताको क्रममा देखिएका विभिन्न समस्याको बीच पनि अबको २÷३ दिनभित्रमा सहमति हुने जिकिर गर्नुभयो ।
