सप्तरी, १९ असोज ।
सप्तरीको भारदहस्थित कोशी पलारमा सयौँ बिगाहामा लगाइएको केरा खेतमा पानी पसेपछि कुहिन थालेको छ । स्थानीय कृषकले करिब एक हजार ५०० बिगाहामा लगाएको केरा खेतमै कुहिन थालेको हो ।
पूर्वी पहाडी जिल्लाबाट एक्कासी पानी आएर कोशी नदीमा जम्मा भएपछि कोशी नदिको छेउमै रहेको केरा खेतमा पानी पसेको हो । काटने बेलामा पानी जमेपछि केरा खेतमै नष्ट हुन थालेको स्थानीय हरीशंकर विश्वासले बताउनुभयो ।
पानी पसेपछि केराको बोट सुक्न थालेको र काटेर बिक्री वितरण गर्ने अवस्था नरहेको उहाँको भनाइ छ । बिगत ५३ दिनदेखिको बन्द हड्तालका कारण समेत केरा नष्ट भएको छ । बन्दका कारण केरा बिक्री वितरण नहँुदा किसान चिन्तित भएका छन् ।
यातायात बन्द हुँदा केरा खेतमै कुहिने गरेको हुनुमाननगर योगिनिमाई नगरपालिका–१ सकरदही निवासी रामदेब माझीले बताउनुभयो । यहाँको केरा काठमाडौँसहित पोखरा, नेपालगञ्ज, भैरहवा, बुटवल, झापा, इलाम, धनकुटासम्म बिक्रीका लागि लैजाने गरेको केरा व्यापारी तथा कृषक इन्द्रदेव लौगीले बताउनुभयो ।
