काठमाडौं, १९ असोज ।
ईरानमा जारी एएफसी अण्डर १९ फुटबल च्याम्पियनसीप छनोट अन्तरगत समुहको अन्तिम खेलमा नेपालले आज जोडर्नसँग प्रतिस्पर्धा गर्दैछ ।
सुरुवाती दुई खेलमा जित हात पार्न नसकेको नेपाल आज पहिलो जितको खोजीमा हुनेछ ।
प्रतियोगिताको पहिलो खेलमा आयोजक इरानसँग १०–० को फराकिलो गोल अन्तरले पराजित भएको नेपाल दोस्रो खेलमा कुवेतसँग १–१ को बराबरीमा रोकिएको थियो ।
आजको खेलमा जित हात पारेमा नेपालको अर्को वर्ष बहराइनमा हुने प्रतियोगितामा छनोट हुने सम्भावना जिवित रहन्छ । तर त्यसको लागि समुहको अर्को खेलमा इरानले कुवेतलाई हराउनुपर्ने हुन्छ ।
समुहका दुई खेल सकिँदा ६ अंक जोडेको ईरान शीर्ष स्थानमा रहेको छ । ४ अंकका साथ कुवेत दोस्रो स्थानमा छ भने एक अंक जोडेको नेपाल तेस्रो स्थानमा छ । लगातार दुई खेल हारेको जोर्डनले भने खाता खोल्न सकेको छैन ।
प्रतियोगिताको समुह विजेता, ५ वटा उत्कृष्ट उपविजेता टोली तथा आयोजक बहराईन समेत गरी कुल १६ टोलीले अर्को वर्ष बहराइनमा हुने एएफसी अण्डर नाइन्टिन फुटबलमा सहभागिता जनाउने छन् ।
