काठमाडौ, १९ असोज ।
खोला र कुवाको पानीमा निर्भर दैलेखको सल्लेरी–डाँडागाउँका २९ घरधुरीका स्थानीय बासिन्दा टोलटोलमा नयाँ धारा बनाइएसँगै खुसी भएका छन् ।
स्थानीय गरिबी निवारण कोष नेपालको सहयोग र सामाजिक सेवा केन्द्र (सोसेक) को सहजीकरणमा एकीकृत सामुदायिक विकास परियोजनाअन्तर्गत देउली खानेपानी आयोजना निर्माण सम्पन्न भएपछि डाँडागाउँमा खानेपानी समस्या हटेको हो ।
खोलामा एक घन्टादेखि दुई घन्टासम्म लगाएर दूषित पानी लिएर खानुपर्ने बाध्यता थियो । खानेपानी सामुदायिक संस्थाका सचिव तथा आयोजनाको कोषाध्यक्ष कृष्णबहादुर चन्दका अनुसार खानेपानी घरघरमै आएपछि टोलको सरसफाइदेखि हरेक कुरामा विकास भएको छ ।
उक्त देउली खानेपानी आयोजना निर्माणका लागि गरिबी निवारण कोषबाट रु ११ लाख ३३ हजार ७४५ र सामुदायिक संस्थाबाट रु तीन लाख १८ हजार १५० र गाविसबाट रु ५० हजार सहयोग प्राप्त भएको थियो ।
