काठमाडौ १७ असोज ।
इरानमा जारी एएफसी अन्डर १९ छनोट च्याम्पियनसीपमा नेपालले आज कुवेतसँग १–१ गोलको बराबरी खेलेको छ ।
समेन अल एमेह रंगाशालामा भएको खेलमा बलियो टोली कुवेतलाई नेपालले १–१ गोलको बराबरीमा रोक्न सफल भएको हो ।
नेपालका लागि बिमल घर्ती मगरले ६१ औ मिनेटमा गोल गरेर अग्रता दिलाएका थिए । तर कुवेतले खेलको ७१ औं मिनेटमा खालीदको गोलबाट बराबरी गरेको थियो ।
यो बराबरीसगै नेपालले एक अंक जोडेको छ । पहिलो खेलमा आयोजक इरानसँग १० ÷ ० को लज्जास्पद हार बेहोरेको नेपाली टोली कुवेत विरुद्धको खेलमा सुधारिएको प्रर्दशन गर्दै अगाडी बढेका थिए । दोस्रो हापमा दुवै टिमले एक एक गोल गरेका थिए ।
हालै काठमाडौमा सम्पन्न प्रथम साफ च्याम्पियनसीप फुटबलको उपाधि जितेर उच्च मनोबलका साथ इरान पुगेको नेपालले पहिलो खेलमा निराशाजनक प्रदर्शन गरेको थियो । समुह ई मा रहेको नेपालले आगामी मंगलबार जोडर्नसँग प्रतिस्पर्धा गर्नेछ । प्रतियोगिताको समुह विजेता , उत्कृष्ट पाँच उपविजेता र आयोजक बहराइनले फाइनल चरणमा प्रतिस्पर्धा गर्नेछ ।
