काठमाडौँ, १७ असोज ।
व्यवस्थापिका–संसद्को आजको बैठकमा दुईवटा शोकप्रस्ताव पारीत भएका छन ।
नेपाली काँग्रेसका नेता नरबहादुर थापा र एनेकपा माओवादीका नेता रामचरण चौधरीको निधनमा शोक प्रस्ताव पारित गर्दै बैठक आगामी शुक्रबारसम्मका लागि स्थगीत भएको छ ।
गोर्खा परिषद्बाट २०१५ सालको संसदीय निर्वाचनमा काठमाडौँ क्षेत्र नं २ बाट निर्वाचित नेपाली काँग्रेसका नेता थापाको ९० वर्षको उमेरमा हृदयघातबाट निधन भएको थियो ।
यसैगरी २०६४ सालको संंविधानसभाको निर्वाचनमा बर्दिया क्षेत्र नं ४ बाट निर्वाचित एनेकपा (माओवादी)का नेता तथा पूर्वमन्त्री चौधरीको असोज १५ गते निधन भएको थियो ।
त्यसअघि सभामुख सुवास नेम्वाङले राष्ट्रपतिबाट सातदिनभित्र नयाँ मन्त्रिमण्डल गठन गर्नका लागि गरिएको आह्वानसम्बन्धी राष्ट्रपतिको कार्यालयबाट प्राप्त पत्र पढेर सुनाउनुभएको थियो ।
संसद्को अर्को बैठक शुक्रबार दिउँसो १ः०० बजेका लागि बोलाइएको छ ।
