काठमाडौं, १७ असोज ।
तराईका जिल्लामा आज धार्मिक विधिपूर्वक जितिया पर्व मनाईँदै छ । मैथिल समुदाय र थारु जातिका आमाहरुले आ–आफ्ना सन्तानको दीर्घायु एवं मङ्गलमय कामनाका लागि यो पर्व मनाउने गर्दछन । आज राति ८ बजेदेखि विधिवत रुपमा ब्रत बसेर पर्वको शुभारम्भ भएको मानिन्छ ।
असोज कृष्ण अष्टमी तिथिमा यो पर्वको उपवास सुरु हुने र नवमीमा उपवास सम्पन्न हुने पण्डित रासमोहन झाल बताउनुभयो । हिन्दू धर्मावलम्बीहरूले उपवास गर्ने पर्वहरूमा सबैभन्दा बढी समयसम्म उपवासमा बस्नुपर्ने र सो अवधिमा थुक पनि निल्न नपाउने कडा बन्देजका कारण यो पर्वलाई सबैभन्दा कठोर पर्वका रुपमा चित्रण गरिएको छ ।
तिथिको समयको हेरफेर भएका कारण ओटघनको साइत नपरेकाले व्रतालुहरूलाई लगातार ३६ घन्टासम्म निराहार बस्नुपर्ने पण्डित झाले बताउनुभयो ।
पर्वको तिथिको समयअगावै अर्थात सप्तमी तिथिको उत्तराद्र्धमा खासगरी मध्यरात्रिको समयमा व्रतालु आमाका साथै परिवारका सम्पूर्ण सदस्यहरू दही–च्युरा, मिठाई, फलफूललगायतका भोजन सामग्री खाने गर्दछन । यसलाई ‘ओटघन’ भन्न्ो गरिन्छ ।
अति नियमनिष्ठाका साथ मनाइने यस पर्वमा सप्तमी तिथिका दिन व्रतालु माताहरूलाई पोखरीमा स्नान गरी सूर्यदेवलाई जल अर्पण गरी जिमूतवाहन देउताको व्रतको सङ्कल्प गर्नुपर्ने प्रचलन समेत रहि आएको छ ।
