काठमाडौँ, १६ असोज ।
नेकपा एमालेका अध्यक्ष केपी शर्मा ओलीले नयाँ सरकारको गठनसँगै विद्यमान समस्या समाधान भएर जाने बताउनुभएको छ ।
युवा संघको बैठकलाई आज राजधानीमा सम्बोधन गर्दै उहाँले सकेसम्म सहमतीय नभए बहुमतीय सरकार चाँडै गठन भइ जनताले भोग्नु परेका समस्याहरु समाधान हुँदै जाने बताउनुभयो ।
संविधानसभाबाट संविधान जारी भएपछि भारतले अघोषित नाकाबन्दी गर्दा जनजीवन प्रभावित भएको भन्दै उहाँले उक्त नाकाबन्दी वार्ताका माध्यमबाट छिट्टै अन्त्य हुने उल्लेख गर्नु भयो ।
नेपाल भूपरिवेष्ठित राष्ट्र भएकाले समुद्रसँग जोड्नका लागि अधिकार भएको बताउँदै उहाँले नाकाबन्दी भएर पनि नयाँ संविधान पाएकामा नेपाली खुसी भएको विचार व्यक्त गर्नुभयो ।
उहाँले प्रतिक्रियावादीको चलखेलका कारण पहिलो संविधानसभाले संविधान जारी गर्न नसकेको र दोस्रो संविधानसभामा उनीहरुको जोर नचलेपछि मधेसी जनतालाई उचाल्ने काम भएको बताउनुभयो ।
