काठमाडौँ, १५ असोज ।
पेट्रोलियम पदार्थको अभावसँगै काठमाडौँवासीको तिर्खा मेटाउन बहुप्रतीक्षित राष्ट्रिय गौरवको मेलम्ची खानेपानी आयोजनाका सात वटै स्थानबाट सुरुङ खन्ने काम रोकिएको छ ।
इन्धन अभावका कारण बिहीबारदेखि सातै स्थानको सुरुङ निर्माणको काम रोकिएको मेलम्ची खानेपानी विकास समितिका कार्यकारी निर्देशक घनश्याम भट्टराईले जानकारी दिनुभयो ।
आयोजनाको सात स्थानबाट काम सञ्चालन गर्न मासिक दुई लाख लि डिजेलको आवश्यकता पर्ने पनि बताइएको छ । सुरुङभित्र आएका ठूला ढुङ्गालगायत कडा चट्टान विस्फोट गर्न विस्फोटक पदार्थको समेत अभाव भएकाले काम रोक्न बाध्य भएको समितिले जनाएको छ ।
सिन्धुपाल्चोकको हेलम्बु गाविसबाट ल्याइने पानीका लागि खनिनुपर्ने २७.५ किमी सुरुङमध्ये अहिलेसम्म १४ किमी मात्र सकिएको र १३.५ किमी बाँकी रहेको समितिले जनाएको छ । विसं २०७३ असोज मसान्तसम्म काम सक्नुपर्ने सम्झौता इटालेली निर्माण कम्पनी सिएमसीसँग गरिए पनि अब नसकिने निश्चित भएको जनाइएको छ ।
