काठमाण्डौ,१५ असोज ।
पोखरामा निर्माण गरिन लागिएको पोखरा अन्तर्रा्ष्ट्रिय विमानस्थलको पहिलो, दोश्रो र तेश्रो चरणमा गरी आजसम्म २४५ जना जग्गाधनीलाई रु ८० करोड मुआब्जा वितरण गरिएको छ ।
विमानस्थल निर्माणको लागि ६२९ रोपनी जग्गा थप अधिग्रहण गरिन लागिएकोमा आजसम्म १९३ रोपनी जग्गाको मुआब्जा जग्गाधनीले बुझिसकेका छन् । पोखरा अन्तर्रा्ष्ट्रिय विमानस्थल परियोजनाका वरिष्ठ अधिकृत चन्द्रमणि सापकोटाका अनुसार पहिलो चरणमा ७१ रोपनीको ५६ जना, दोश्रो चरणमा ११४.७ रोपनीको १७५ जना र तेश्रो चरणमा ६.८३ रोपनीको १४ जनाले मुआब्जा बुझिसकेका छन ।
अघिल्ला चरणमा जग्गाधनीले मुआब्जा लिन आएमा म्याद बढाएर भएपनि दिन कास्कीका प्रमुख जिल्ला अधिकारी कृष्णबहादुर रावतले निर्देशन दिए बमोजिम पहिलोचरणमा छुटेका १३ जनाले पनि मुआब्जा लगेको उहाँले बताउनुभयो । अधिग्रहणमा घरटहरा परेका जग्गाधनीले पनि मुआब्जा बुझेका छन् ।
विसं २०३२ सालमा अन्तर्रा्ष्ट्रिय विमानस्थल निर्माण गर्न भनेर ३१०६ रोपनी जग्गा अधिग्रहण गरिएकोमा नपुग ६२९ रोपनी जग्गा अधिग्रहण गरेर विमानस्थलको काम अघि बढाउन लागिएको छ । विमानस्थलको लागि चीनको एक्जीम बैंकसँग रु २१ अर्व ऋण स्वीकृतको प्रकृया अन्तिम चरणमा रहेको परियोजनाले जनाएको छ ।
