महोत्तरी, १५ असोज ।
संयुक्त मधेसी मोर्चाले जारी राखेको अनिश्चितकालीन आमहडतालको प्रत्यक्ष असर महोत्तरीको सञ्चारमाध्यममा पनि परेको छ ।
नयाँ संविधानमा सीमाङ्कनको मुद्दा लिएर सडक आन्दोलनदेखि आमहडताल हुँदै सीमामा धर्ना गरिंदा त्यस्तै प्रत्यक्ष प्रभाव जिल्लास्थित हरेक सञ्चारमाध्यममा पर्दै आएको छ ।
करिब डेढ महिनादेखि जारी रहेको मधेसी मोर्चाको आन्दोलनका क्रममा यहाँका सञ्चारकर्मी तथा सञ्चार गृहका लागि चाहिने डिजेल, पेट्र«ोल, छपाइ कागज, इन्टरनेटको रिचार्जलगायत विभिन्न आवश्यक सामग्रीको अभावमा कठिनाइ हुँदै आएको छ ।
महोत्तरीको बर्दिबासबाट केही वर्ष यतादेखि नियमित रुपमा प्रकाशित हुँदै आएको बर्दिवास दैनिक पत्रिका आजकाल विभिन्न रङ्गका कागजमा प्रकाशन हुँदै आएको पाइएको छ । यस्तो रङ्गीविरङ्गी कागजमा छपाइ गर्नु रहर नभई बाध्यता रहेको पत्रिका प्रकाशक रमण काफ्लेले बताउनुभयो ।
मौज्दातमा रहेको सेतो रङ्गका सबै कागज सिद्धिएपछि बजारमा जुन रङ्गको कागज पायो त्यसैमा पत्रिका प्रकाशित गर्दै आएको काफ्लेको भनाइ छ । एक हप्ताभित्र पनि स्थिति साम्य नभए कागजको अभावमा पत्रिका बन्द गर्नुपर्ने बाध्यता सिर्जना हुने उहाँको भनाइ छ ।
यहाँका एफएम रेडियो चर्को विद्युत्भार कटौतीका कारण बन्द हुने स्थिति सिर्जना भएको छ । एक त विद्युत्भार कटौतीको मार त्यसमा पनि जेनेरेटर चलाउन डिजेल नपाएपछि अधिकांश रेडियो बन्द हुँदै आएको रेडियो सञ्चालकको भनाइ छ ।
