काठमाडौ १५ असोज ।
उपप्रधान तथा स्थानीय विकासमन्त्री प्रकाशमान सिंहले भूपरिवेष्टित विकासोन्मुख मुलुकलाई मालसामानको निर्वाध प्रवाह सुनिश्चितता हुनुपर्नेमा जोड दिनुभएको छ ।
संयुक्त राष्ट्रसंघको ७०औँ महासभालाई आज सम्बोधन गर्नुहुदै मन्त्री सिंहले कुनै पनि बहानामा वस्तु र सेवा प्रवाहलाई अवरोध गर्न नहुने धारणा राख्नुभयो । उहाँले भूपरिवेष्टित विकासोन्मुख मुलुकका ४५ करोड जनताको जीवन परिवर्तन गर्ने भिएना कार्ययोजनाको प्रभावकारी कार्यान्वयन अपरिहार्य रहेकोमा पनि जोड दिनुभएको छ ।
भिएना कार्ययोजनाको स्मरण गराउँदै उहाँले भूपरिवेष्टित विकासोन्मुख मुलुकको बिना व्यवधान समुद्रसम्मको पहुँच विश्व समुदायले सुनिश्चित गर्नुपर्ने बताउनुभयो ।
करिब आठ वर्षको अथक समावेशी, पारदर्शी एवम् सहभागितामूलक लोकतान्त्रिक अभ्यासबाट नेपाल समावेशी एवम् लोकतान्त्रिक संविधान जारी गर्न सफल भएको जानकारी गराउँदै नेपाली प्रतिनिधिमण्डलका नेता सिंहले उक्त संविधान ९० प्रतिशतभन्दा बढी सभासद्ले अनुमोदन गरेको बताउनुभयो ।
