काठमाडौ १५ असोज ।
रेडबुल राष्ट्रिय लिग फुटबल प्रतियोगितामा आज दुई विभागीय टोली नेपाल पुलिस क्लव र सशस्त्र प्रहरी एपीएफबीच प्रतिस्पर्धा हुदैछ ।
१० खेलबाट १७ अंक जोडेको एपीएफ लिग तालिकाको पाँचौ स्थानमा रहेको छ भने १२ खेल खेलेको पुलिस १२ अंक सहित तालिकाको सातौं स्थानमा छ ।
१३ खेलबाट २४ अंक जोडेको झापा ११ शीर्ष स्थानमा कायमै रहँदा एक खेल कम खेलेको थ्रीस्टार क्लव २३ अंक सहित दोस्रो स्थानमा छ । यस्तै २१ अंकको आर्मी अंक तालिकाको तेस्रो स्थानमा रहेको छ ।
चौथो स्थानको मनाङ मर्स्याग्दीले ११ खेलबाट १९ अंक जोडेको छ । यसअघि हिजो भएको खेलमा उपाधि दाबेदार टीमहरु थ्रीस्टार र त्रिभुवन आर्मी क्लवले १–१ को बराबरी खेल्दै अंक बाँडेका छन् ।
ललितपुरको सातदोबाटोस्थित एन्फा कम्प्लेक्समा भएको खेलमा २५औं मिनेटमा टेकबहादुर बुढाथोकीले गोल गर्दै आर्मीलाई अग्रता दिए ।
तर ३९औं मिनेटमा थ्रीस्टारका सागर थापाले गोल फर्काएपछि खेल १–१ को बराबरीमा सकिएको हो ।
