काठमाण्डौ,१३ असोज ।
मेची भन्सार कार्यालय काँकडभिट्टाले भारतले कुहिएका र कम आवश्यकताका वस्तु मात्रै नेपाल पठाएको विरोधमा जाँच पास रोकेको छ ।
भन्सार विभागले कुहिएका तरकारी र फलफूल जन्य वस्तुको जाँच पास नगर्न निर्देशन दिएपछि मेची भन्सारमा जाँचपास रोकिएको हो । मेची भन्सार प्रमुख भीमप्रसाद अधिकारीले आज माछा, सिद्रा, तरकारी लगायत लोड गरिएका ७ ट्रक मालवस्तु भन्सारले जाँच गरेको जानकारी दिनुभयो ।
भन्सारको कदममा व्यवसायीहरुले समेत समर्थन गरेका छन् । मेची उद्योग वाणिज्य संघलगायतका व्यवसायिक संस्थाहरुले समेत भारतवाट पठाइएका कुहिएका र कुहिन सक्ने खालका मालवस्तुको जाँच पास नगर्न अनुरोध गरेको प्रमुख अधिकारीले जानकारी दिनुभयो ।
यसैबिच भैरहवाको सुनौली नाकाबाट इन्धन बोकेका दर्जनौ ट्यांकर र खाद्यान्न बोकेका ट्रकहरु नेपाल भित्रिन थालेका छन ।
आज मध्यान्ह भारतीय भन्सार प्रमुख, सुनौली इलाकाका एसएसबी प्रमुख, भारतीय प्रहरी प्रमुख र नेपालको तर्फबाट सीमावर्ती भन्सार प्रतिनिधि, प्रहरी अधिकारी, भन्सार राजश्व प्रहरी गस्ती प्रहरीबीच भारतमा भएको बैठकपछि सवारीसाधनलाई प्रवेश दिइएको हो ।
