असोज १३, रौतहट ।
तराई जिल्लामा आन्दोलन गर्दै आएको संयुक्त लोकतान्त्रिक मधेशी मोर्चाले प्रमुख दलसंग औपचारिक वार्ता गर्ने तयारी गरेको छ । रौतहटमा आज बसेको मोर्चाको बैठकले तीन दलीय वार्ता टोलीसंग हिजो भएको अनौपचारिक छलफल सकारात्मक भएको भन्दै बार्तामा बस्ने निर्णय गरेको छ ।
प्रमुख तीन दल गम्भिर भए वार्तामा बस्ने निर्णय गरेको तराई मधेश लोकतान्त्रिक पार्टीका नेता अनिल सिंहले जानकारी दिनुभयो । मोर्चाको बैठकले औपचारीक बार्तामा बस्न तमलोपा अध्यक्ष महन्थ ठाकुर जिम्मेवारी दिएको छ । अध्यक्ष ठाकुरले हिजो तीन दलीय वार्ता टोलीसंग भएको छलफलबारे जानकारी गराउनु भएको थियो ।
रौतहटमा अपरान्न हुने मोर्चाको संयुक्त आमसभालाई सम्बोधन गरे लगत्तै वार्ताका लागि ठाकुर काठमाडौं आउनुहुने बताइएको छ । यस्तै मोर्चाले भोली पूर्व मेचि देखि पश्चिम महाकालीसम्म मानव साङ्लो बनाएर सीमा घेर्ने तयारी गरेको छ ।
आन्दोलनको नयाँ रुप अन्र्तगत शक्ति प्रर्दशन गर्न र विश्व समूदायलाई मधेस आन्दोलनमा ऐक्यबद्धता प्रकट गर्न त्यस्तो कार्यक्रम ल्याउन लागेको तराई मधेस लोकतान्त्रिक पार्टीका बरिष्ठ उपाध्यक्ष हृदयेश त्रिपाठीले जानकारी दिनुभयो ।
यता प्रमुख तीन दलीय वार्ता टोलीले तमलोपाका महन्थ ठाकुर काठमाण्डौ आएलगतै बार्ता गर्ने तयारी गरेका छन । संसद्को हिउँदे अधिवेशन शुरु हुनुअघि नै असन्तुष्ट पक्षसँग सहमति गर्ने प्रयासमा जुटेका दलहरुले आज पनि छलफललाई निरन्तरता दिने भएका हुन ।
संसद् बैठकअघि नै असन्तुष्ट मधेसी दलहरुसँग सहमति कायम गरी संविधान संशोधनको प्रस्ताव तयार पार्ने सरकारको तयारी छ । यसअघि तीन दलीय वार्ता टोलीले हिजो पनि मधेसी मोर्चाका नेताहरुसँग छलफल गरेको थियो ।
