काठमाडौँ, १३ असोज ।
गैरआवासीय नेपाली संघले देशमा भइरहेको वर्तमान असहज अवस्थाको अन्त्य गर्न नेपाल र भारत सरकारले आपसी छलफल गरी तत्काल समस्या समाधान गर्न आग्रह गरेको छ ।
सङ्घका अध्यक्ष शेष घलेले विज्ञप्ति जारी गर्दै अहिलेको असहजतालाई सामान्य स्थितिमा रुपान्तरण गरी देशको आर्थिक विकास र समृद्धितर्फ उन्मुख हुने वातावरण निर्माणमा सकारात्मक भूमिका निर्वाह गर्न सम्बद्ध पक्षलाई आग्रह गर्नुभएको छ ।
“नयाँ संविधानको घोषणासँगै असहज परिस्थिति सिर्जना भई अत्यावश्यक दैनिक उपभोग्य वस्तुको नियमित आपूर्तिमा बाधा व्यवधान आई देशभरि नै र खासगरी दैनिक मजदुरी गरी जीवन निर्वाह गर्ने निम्नवर्गीय समुदायमा प्रत्यक्ष प्रभाव पर्न गएकामा हामी गैरआवासीय नेपाली मर्माहत भएका छौँ”, विज्ञप्तिमा उल्लेख गरिएको छ ।
सङ्घले नयाँ संविधानको घोषणा हुनु सबैका लागि हर्षको विषय हो भन्दै संविधान देशको आर्थिक विकासका लागि जग हाल्ने एउटा कोसेढुङ्गा हुने विश्वास गरेको छ ।
