काठमाडौँ, ११ असोज ।
व्यवस्थापिका–संसद्को अर्थ समितिका सभापति प्रकाश ज्वालाले अत्यावश्यकीय सामग्रीको आयात सहज बनाउन वैकल्पिक उपायका लागि चीनतर्फको नाका चाँडो खुलाउनुपर्नेमा जोड दिनुभएको छ ।
उहाँले विश्वव्यापीकरणको युगमा नेपालले दोस्रो वा तेस्रो मुलुकबाट खरिद गरी आयात गर्ने सामग्री रोक्न नमिल्ने भन्दै भारतको यो व्यवहारबाट नेपालको सरकार र राजनीतिक दलले क्षमता बढाउनुपर्ने धारणा राख्नुभयो ।
नयाँ संविधानले तराई केन्द्रित दलका धेरै सवाललाई सम्बोधन गरिसकेको र उहाँहरुले उठाएका बाँकी कुरालाई पनि संविधान संशोधन गरेर समाधान गर्न सकिने बताउँदै सभापति ज्वालाले भन्नुभयो– “हाम्रो विविधता र साधन स्रोतको उचित बाँडफाँडको हिसाबले पनि प्रदेशहरु जोडिनुपर्छ ।”
नेपाल चेम्बर अफ कमर्सका अध्यक्ष राजेशकाजी श्रेष्ठले भारत र चीन ठूला बजार रहेका र व्यापारमा पनि उनीहरुले सहुलियत दिएकाले नेपाल लगानीका लागि राम्रो सम्भावना भएको ठाउँ हो भन्दै संसद्मा रहेका आर्थिक ऐन जारी भएपछि लगानीको वातावरण बनाउन थप सहयोग पुग्ने बताउनुभयो ।
प्याभिलियन कम्पनीका अध्यक्ष नरेश श्रेष्ठले निजी क्षेत्रलाई सहयोग गर्दा कुनै व्यवसायीलाई सहयोग गरेका रुपमा मात्रै सरकारले लिने गरेको गुनासो गर्दै निजी क्षेत्रको व्यापार बढ्दा त्यसको लाभ मुलुक र जनतालाई पनि हुने बताउनुभयो ।
गोष्ठीमा भारत, चीनलगायतका मुलुकका प्रतिनिधिको सहभागिता रहेको थियो ।
