दाङ, ११ असोज ।

नेकपा (एमाले)का उपाध्यक्ष युवराज ज्ञवालीले संविधानको गलत व्याख्या नगर्न आन्दोलनरत पक्षलाई आग्रह गर्नुभएको छ ।

प्रेस चौतारी दाङले आज घोराहीमा गरेको साक्षात्कार कार्यक्रममा उहाँले संविधानका अन्तर्वस्तुका बारेमा जानकारी गराउन दलहरुले मधेसकेन्द्रित साझा कार्यक्रम गर्ने तयारी गरिरहेको बताउनुभयो ।

नयाँ संविधानले मधेसी जनतालाई अधिकार सम्पन्न गराउन धेरै आधार दिएको नेता ज्ञवालीको दावी छ । कार्यक्रममा बोल्दै ज्ञवालीले भारतले गरेको अघोषित नाकाबन्दीप्रति विदेशी मुलुकले चासो देखाइसकेको र त्यो नाकाबन्दी लामो समयसम्म नहुने पनि बताउनुभयो ।

कार्यक्रम चौतारी दाङका अध्यक्ष टीकाबहादुर बस्नेतको अध्यक्षतामा भएको थियो ।