काठमाडौँ, १० असोज ।
अखिल नेपाल फुटबल संघ (एन्फा)को आयोजनामा भएको राष्ट्रिय लिग फुटबल प्रतियोगिताअन्तर्गत आज भएको खेलमा थ्रीस्टार क्लब विजयी भएको छ ।
सातदोबाटोस्थित एन्फा कम्प्लेक्सको खेल मैदानमा भएको सो प्रतियोगितामा थ्रीस्टारले मोफसलको टोली सुदुरपश्चिमाञ्चल फुटबल क्लबलाई १–० गोलअन्तरले पराजित गर्दै विजयी भएको हो ।
यस जितसँगै २२ अङ्क जोडेको थ्रीस्टार लिगको पहिलो स्थानमा उक्लिएको छ तर त्यो लामो समयसम्म टिक्नको लागि भने झापा फुटबल क्लब र नेपाल प्रहरी क्लबबीचको खेलको नतिजामा भर पर्नेछ ।
अहिले झापामा भइरहेको खेलमा घरेलु टोली झापा क्लबले प्रतियोगितामा हार बेहोरेमात्र थ्रिस्टार लिगको शीर्ष स्थानमा रहनेछ अन्यथा लिगको दोस्रो स्थानमा हुनेछ ।
त्यस्तै, सुदुरपश्चिमाञ्चल भने १४ अङ्कका साथ लिगको छैटौँ स्थानमा छ । झापाको जारी लिगमा २१ अङ्क छ । यदि झापाले विजय हासिल गरेको खण्डमा २४ अङ्कका साथ लिगको शीर्ष स्थानमा रहनेछ ।
थ्रीस्टारको जीतमा विदेशी खेलाडी ओलाव नायक बने । उनले खेलको पहिलो हाफको १४औँ मिनेटमा गरेको एक गोल नै थ्रीस्टारका लागि निर्णायक गोल सावित भयो ।
खेलको निर्धा्रित समयसम्म गोल फर्काउन निकै प्रयासरत सुदुरपश्चिमाञ्चल अन्ततः हार बेहोर्न बाध्य बन्यो ।
